上海之旅 (28/03/2009-01/04/2009)

因為毛爸要去上海上堂，所以因利乘便就買張機票跟住去玩幾日啦，出發前梗係要安排送咗毛毛去嫲嫲度先啦，你睇毛毛個樣有幾咁唔願意，好快返架啦，一返嚟就去接返你好唔好，唔好嬲啦！　　　

今次係我第一次坐飛機返大陸，唔使帶Passport去機場，好似總係差ｄ嘢咁！

落機已經天黑啦，隨便去食咗碗麵同雲吞就算啦，小店嚟架，味道都唔錯喎！

之後就發現咗呢間Starbucks，呢幾日嘅下午茶有着落啦！

星期日就同毛爸去咗外灘行吓，再去埋豫園，不過我真係唔鍾意呢度囉，周圍都係人，見到已經頭痛，仲要驚俾人扒嘢同小心ｄ人放嘅飛劍（呢度真係勁多人放飛劍呀），心理壓力好大，去旅行唔應該咁，本來諗住毛爸上堂嗰３日我自己去行吓，不過經過星期日之後，決定留係酒店同係酒店附近行吓算啦！　　　

南翔小籠包，好想試，不過太多人，最後都放棄咗！

之後就改咗去第２間食，呢度ｄ小籠包真係唔得囉，不過湯圓就幾好！

本旅遊書介紹好有名嘅蔡記生煎包，結果麻麻地，又失望而回！

大陸一向都係我唔鍾意去嘅地方，不過諗住上海係大城市，應該會好ｄ，但都好失望，我試過過馬路，見到行人過路燈係綠公仔就過啦，過到一半有車嚟，唔停俾我不特止，仲不斷有車嚟，攪到轉咗紅燈我都過唔到，好嬲咁行返轉頭再等下次綠公仔，綠公仔燈着ｄ車又唔停，要綠公仔燈嚟做咩！

仲有我好怕人食煙，呢度所有餐廳都無非吸煙，你去食飯就一定要吸人哋二手煙，好討厭吖！唯獨係Starbucks係室內唔俾食煙，所以我呢幾日都係喺Starbucks同酒店，仲有就係行吓超市咁囉，好在我都仲有好多相要執，都用咗唔少時間執相，南美之旅嘅相簿終於係呢個情況下完成咗，都可以話係意外收獲啦！　　　　　　　　　　　

呢度狗狗食嘅嘢都好平，不過全部都係Made in China，所以都無買～～～

唯一買咗嘅就係譚木匠嘅呢兩把牛骨梳啦，之前買過，好好用！

聽日就返香港啦，好開心，係香港生活真係好幸福（除咗狗狗無狗權之外！）～

試完再試

上次食完粒珠甜點嘅布丁之後，真係回味無窮，今日再嚟試新嘢！

Blueberry Jam  藍莓果醬

屋企無麵包，無得試，聽日去買ｄ鬆餅返嚟試咗再話你知，你淨係睇吓個包裝就知道美女廚神幾俾心機去整啦，好想偷食呀！

Cartoon Cookies  卡通人物牛油曲奇

好好味，又鬆又香，呢ｄ咁可愛嘅cartoon cookies本嚟係諗住送俾阿哥兩個女架，但係我喺返屋企嘅小巴度忍唔住，偷食咗一件！正！

Almond Jumble 杏仁薄脆

真係唔得囉，我係話我再咁食落去唔得呀，呢個杏仁薄脆真係好食到停唔到口，唔知點講，總之你食咗第一塊之後，你就唔可以停口，直到食晒嗰包為止，好在Alice係大包裡面再分開小包啫，唔係我一次真係可以食晒成大包架！呢款真係要極力推薦吖！               

毛tel又客滿啦！

唔知我ｄ老友係咪知我悶呢，星期二晚又嚟咗陪我，仲話可以陪足我成個星期喎，咁好？係咪真架?

Cola你又話陪我嘅，點解痴住我Daddy架，仲痴到瞓著埋添......

Creamy你都好似話嚟陪我架喎，點解淨係喺枱底玩玩具架！

你哋唔陪我，咁我去揾周公子囉......

呢幾日我哋食咗好多款肉肉，最特別都係呢味脆肉鲩啦，好好味！

噚日媽咪抺地，Cola周圍走，就俾媽咪困咗係我個飛機籠裡面，唔知Cola係咪愛上咗我個籠，媽咪開門佢都唔出嚟喎！

Cola：姨姨原來飛機籠咁舒服架，坐多陣得唔得呀?

毛豬豬又出動啦！

一個陽光燦爛嘅星期六，無理由唔出去跑返轉架，仲要今日係我一個朋友仔嘅生日會，所以今日12點已經出發去彭福公園玩啦，本來約咗奀仔１２點半，不過我哋太心急早到咗，咁等我揾ｄ朋友仔玩一陣先啦！

喂，做個朋友得唔得呀？

靚女，點先可以好似你咁fit呀？

過兩招嚟用吓得唔得呀？

媽咪，我識到好多朋友呀！

好滿足吖！　　　

我最鍾意同陽光玩遊戲，曬個日光浴先！

玩咗一輪，奀仔就到咗啦，不過個傻Daddy竟然唔記得幫我同奀仔影相喎，等我遲ｄ去奀仔度偷返ｄ相返嚟俾你哋睇吓佢個靚仔樣啦！

由於媽咪早幾日病咗，噚日仲睇緊醫生，今日都係啱啱好返ｄ，所以都唔陪我同陽光玩遊戲吖，奀仔到咗一陣我哋就走啦，生日蛋糕都無食呀，不過Queenie ee都請咗兩個小蛋糕我食呀，多謝晒Queenie ee & Uncle Tony呀，祝奀仔生日快樂，身體健康，日日都咁開心！！　　　　　　　　

跟住我哋又去西貢同ｄ朋友仔飲茶茶啦，我哋約咗好耐架啦，終於都約到啦，唔該晒Priscilla ee 幫我哋約晒咁多朋友仔！10人10狗，夠晒大場面啦！Katy ee最早到呀，麻煩晒你幫我哋揾位吖！呢幅相嘅食物只係冰山一角，不過我哋小狗門，全部都係得個睇字囉！呢個Daddy都唔知點做攝影師，點解影唔到我ｄ朋友仔架！

飲完茶，Spicy,Bingo,小吉,紅豆,大佬Baby,bowie同Ginny去咗獅子會玩，由於媽媽未好返晒，Daddy唔俾去，又無得玩，咁我哋就返屋企啦，下次再一齊玩過啦！

雖然飲茶無嘢食，好在有Jo ee請我哋食芝士餅餅補返數啫，好好味！Jo ee仲請埋Daddy同媽咪食ｄ好靚靚嘅餅餅吖，我就無份食啦，不過見佢兩個食個樣，笑晒咁，梗係好好味啦！

今日仲見到美女廚神Alice ee 呀，ee 整ｄ甜品真係超級好味，媽咪次次睇親 ee 個 blog就雙眼放光，幾乎口水都滴埋出嚟吖，而家 ee 開咗網上餅店"Lup Chu Dessert"　媽咪梗係即刻訂嚟試吓啦！

呢個係ｅｅ今日請我哋食嘅榛子蛋糕，好香好滑呀！

栗子戚風蛋糕，又軟又彈，真係好似一陣風咁就俾嗰兩隻為食鬼食晒啦！

再嚟３款布丁，第１款係芝麻布丁，ｄ芝麻香到呢，又香又滑，再加埋個心心杯，俾100分吖！　　　

第２款日本牛奶布丁，呢款甜品媽咪只會對日本出產嘅有興趣架咋，喺香港出產佢從來都唔會試架，淨係會去ｄ日式百貨公司買日本出產嗰ｄ，媽咪今次係咪想考驗吓Alice ee呢？不過Alice ee點會俾你考起吖，Alice ee你又一傑作呀，媽咪食到唔停得，一次過食咗１杯芝麻同２杯牛奶布丁！不過佢好衰，一ｄ都無分俾我吖！

最後一款係豆漿芝麻布甸，ee話食嗰陣先加ｄ芝麻漿落去，呢款ｄ芝麻漿真係有少少搶咗ｄ豆漿味，唔知係咪媽咪落得芝麻漿太多呢？下次叫佢落少ｄ試吓先，不過兩款味道媽咪都咁鍾意食，邊款多ｄ都無所謂啦！