心肝寶貝

由日本返嚟之後就一直忙住搞我同毛爸嘅南美之旅，南美一個好嚮往但又好陌生嘅地方，好多好多年前已經好想去，但因為好多外在嘅條件唔容許（其中當然包括錢同時間呢兩樣最重要嘅嘢啦），所以一真遲遲都未可以成行。

有幸毛爸今次肯咁大手筆帶我去咁遠，今次我一定搞得好好睇睇，唔會要佢失望嘅！

由於今次唔準備跟團，自由行去，所以去之前嘅準備工作都幾多，南美真係一個好大嘅地方，係開始揀要去邊幾個國家嘅時候已經好難決定啦，而且南美地方大，一個旅遊點去另外一個旅遊點嘅交通接駁主要係靠長途巴士或者飛機，長途巴士，下下都話要坐幾十個鐘頭，我哋邊可以用咁多時間係交通上面呀！咁我地唯有揀飛機啦，但飛機嘅班次又唔係好頻密喎，所以都花咗唔少時間係安排飛機接駁呢方面，最後今次呢個南美之旅總共要坐11程飛機，可能今次去完，以後見到飛機都怕怕呀，不過無計啦，鬼叫你咁想去咩！唯一有ｄ安慰嘅係因為金融海嘯買到ｄ平價機票囉！

南美對佢了解唔多，所以覺得佢好神秘咁，但係揾資料期間發現佢原來係一個熱情﹑自然風景靚又多﹑有好多適合唔同人需要嘅景點﹑可動亦可靜，可以話你想玩咩都有！最後因為時間同安全嘅關係我哋放棄咗巴西嘉年華會，因為巴西嘉年華會時酒店超貴同超滿，而且嗰段時間聽人講治安好差，所以我哋淨係會去巴西嘅邊皮”伊瓜蘇瀑布”睇吓瀑布就算啦，另外主力會去阿根廷同智利！

而家好多嘢已經落實咗，我哋會喺今年嘅平安夜出發，年廿九返，一共去32日，趕得切返嚟同毛毛過年。但到咗呢一刻真係好擔心毛毛，佢見唔到我哋32日會唔會好唔開心，會唔會以為我哋唔要佢呢？雖然嫲嫲同爺爺都好錫毛毛，而毛毛亦習慣喺嫲嫲同爺爺度小住，不過從未試過咁長時間，唔擔心就假啦，而且見唔到毛毛32日可能發神經嗰個係我囉！

所以而家開始要安排好小毛毛呢32日嘅活動，希望佢有得玩有得食會覺得時間快ｄ過啦，毛毛 I love you！唔好嬲Daddy同媽咪呀！

喺呢段揾料嘅日子裡面，真係少咗帶毛毛去街街玩，但係佢好乖無扭計，有時仲喺我個肚腩度瞓覺，陪我一齊上網揾資料，小狗就係咁單純同忠心，有主人係身邊就已經好滿足，對住佢哋真係好開心！