我係一個好好好...鍾意去旅行嘅人，由一開始出嚟做嘢，自己識揾錢就開始去旅行，最初去旅行好鍾意去d好遠嘅地方，因為唔多機會出門，一出去當然想去遠ｄ，睇多ｄ嘢啦！到近幾年，年紀開始大先喜歡去日本同曼谷～
歐洲就係我當年不二之選，而瑞士同意大利更加係令我瘋狂嘅地方，另外東歐嘅布拉格都係令我念念不忘....
就係咁，一有假期我同毛爸就會出走歐洲，年年如是，直至有一次我喺瑞士坐火車時發現對窗口外面嘅風景已經再提唔起興趣，就同毛爸講短期內我唔想再嚟歐洲啦，就係咁我哋已經７年無踏足過歐洲～
當年喺歐洲坐火車成日都會遇到ｄ帶埋狗狗一齊坐車嘅人，佢哋人同狗上車都好自然，主人揾到位坐抵，狗狗就會自己坐去座椅底或者旁邊，一切都好自然，好似狗狗可以坐車係理所當然咁，遇著呢ｄ咁好機會我一定唔放過，喺狗狗旁邊你一定揾到我！
你哋都知道我鍾意帶毛毛去旅行，其實一開始我係諗住同毛毛去歐洲，可以喺瑞士嘅草原上奔跑、喺萊苬河上睇日落、坐住馬車去遊城堡、喺寧靜嘅國王湖湖中心度聽船長嘅喇叭聲...你話幾咁好呢...不過一直因為十幾個鐘頭嘅機程令我同毛爸卻步，真係唔放心一個毛小孩，自己一個喺牲口艙渡過十幾個鐘頭，所以最後我哋選擇咗去日本，放棄咗歐洲！
隨住毛毛去旅行嘅經驗多咗，而我哋又諗到方法可以令毛毛唔使十幾個鐘頭自己喺牲口艙，兩程長程機都可以同我哋一齊坐，我同毛爸決定帶毛毛衝出亞洲，向歐洲出發！
今次我哋揀嘅目的地係德國，今次好好彩有歡家同我哋一齊傻！
而家我哋都係喺起步階段，有ｄ細節嘢，我會喺跟住嘅網誌上再詳細解釋～
