2013 玻利維亞+南極 - 準備出發

準備咗一年有多嘅行程，仲有5日就出發，已經開始執行李，今次又係由3度到30度嘅衫都要帶，仲要好多特別行裝，好似去玻利維亞用嘅睡袋，行山stick，南極用嘅水鞋、防水褲等等...要pack晒落兩個喼度都真係唔容易，仲要每個喼限20kg，煩！如果唔係就內陸機我就唔洗咁煩啦！

今次好多嘢都係未知，就連入唔入到玻利維亞我都唔敢諗，天空之鏡更加要幸運加幸運先可以睇到，好耐無試過去旅行前咁忐忑，今次對我呢個去旅行會well plan嘅人嚟講係一個大挑戰，毛爸最好，而家佢連點轉機，去邊度先都未知，佢應該仲未識驚...希望一切順順利利！

另外就係隻小毛毛啦，成個月無得見真係掛c我，呢幾日我會盡量帶佢去玩，嚟緊成個月無街街去呀...
毛毛，Daddy媽咪會好掛住你，你要乖乖聽爺爺嫲嫲話，Daddy媽咪一返嚟會第一時間去接你，知道麻！

2013 三姊妹日本東京箱根食浸買聚舊遊 - Day 6 (17 Jan 2013)

第六天 : 東京－＞香港

本來今朝６點我哋係準備去築地市場嘅，不過鬧鐘响時覺得仲飽過噚晚瞓時，又好眼瞓喎...咁我就問吓其他嗰兩隻魔鬼啦，點知個個都係咁，於是三個一齊再瞓過，唔食啦！築地下次先再去啦！

早餐我淨係飲咗杯咖啡，實在食唔落啦！

跟住就去咗買生果！呢隻熊本士多啤梨好貴，不是唔知好唔好食，買４粒試吓先，唔好食都無咁肉亦！結果係同普通日本士多啤梨一樣，無特別！

買埋生果返酒店pack好Ｄ嘢就準備坐一點嘅機場巴士出機埸啦！


好在唔洗自己攞，酒店有服務員幫我哋拎晒出嚟同拎上車，好好service呀！

２：４５到機場，我哋三個Ｄ行李都好嚇人吓！每人五件！

我只係超重0.4kg, 順利過關！

喺機場食咗碗超難食拉麵，激Ｃ，嘥咗個quota添！

手提行李都咁多件

入咗閘繼續買，真係買到上機前一分鐘，我Ｄ姊妹戰鬥力真強勁！

坐定定好快就開機，好在個飛機餐都唔錯，可以飽飽咁返香港！

2013 三姊妹日本東京箱根食浸買聚舊遊 - Day 5 (16 Jan 2013)

第五天 : 涉谷(最邪惡的一天)
今日係成個行程最邪惡的一天，一切由一個邪惡早餐開始！

Honey Latte - 清甜嘅蜜糖加埋香濃嘅咖啡，正呀！

呢個半生熟蛋三文治真係好食到無朋友呀！

上足電後就坐JR去涉谷，開始今日全日shopping嘅瘋狂日子啦！

買買買...相都無影，半場休息去咗下面呢度食夀司！

梅丘寿司の美登利 Umegaoka sushi no Midori
澀谷區 / 渉谷區道玄坂1-12-3 Mark City4F
http://www.sushinomidori.co.jp/shibuya.html

邪惡嘅蟹羔沙律...膽固醇超標都要食呀...實在太太太好味啦！

呢個set只係二百幾蚊，仲包埋上面兩樣邪惡嘢同甜品，真係抵到爛！ 

件件都好新鮮，一粒飯都食晒，大滿足呀！

下午繼續掃掃掃...

我覺得我哋有Ｄ似水貨客同蝗蟲呀！

去食晚餐先將Ｄ戰利品放咗去locker先，唔係我驚餐廳要俾間房我哋放行李呀！

明天就返香港，所以特登安排最好嘅一餐今晚食，等大家好好記住我哋呢個瘋狂之旅！

六哥仙
〒160-0023東京都新宿区西新宿1-3-1
サンフラワービル6F/7F（大ガード交差点角）
http://www.rokkasen.co.jp/

呢餐我哋揀咗sasabubu + BBQ + 任飲放題，二小時，睇你食得幾多啦！

Ｄ黑毛和牛真係好多雪花，好有牛味！

海鮮全部都好新鮮又大隻，咬落去好有滿足感！

呢間六哥仙真係好好味，下次再去東京一定係我必去嘅餐廳！

食飽已經11點，拿拿聲去JR站個locker攞埋Ｄ行裝返酒店執行李啦，明天一早仲準備去築地食嘢架！

返到酒店執好行李瞓時已經係零晨二點半啦！

PS. 我唔敢影我哋間房執嘢嘅情況俾大家睇，我驚會引起恐慌呀！

2013 三姊妹日本東京箱根食浸買聚舊遊 - Day 4 (15 Jan 2013)

第四天 : 小涌谷-->箱根湯本-->池袋-->上野

今朝浸咗溫泉先去食早餐，早餐超豐富，我最愛的日式早餐呀！

噚晚嚟到時雖然只係５點幾，不過已經黑晒，今朝離開前要影吓間酒店靚景先！

酒店專車送我哋去返小涌谷站，一個小小嘅車站，月台只可以停到兩卡車，要過對面月台要橫過鐵路軌，我對上一次咁樣喺日本坐火車係1997年，轉眼就十幾年啦！





半個小時就到咗箱根湯本，仲有半個鐘我哋架返新宿嘅浪漫號先開，把握時機喺車站附近買吓手信先！


因為太多行李，我哋返酒店check-in完放抵晒Ｄ戰利品就向上野出發啦，地下好多雪，想像到噚日有幾大雪，好在去咗箱根咋！

Lunch去咗元祖食迴轉壽司～

 

跟住就去咗二本和菓子買手信，有人買到拎唔到要買個超大環保袋！

中途仲去咗間幾層樓高嘅玩具店買玩具，接住就去Sky Tree，本來係去影吓相買吓紀念品，不過當我見到呢間舖時癲咗，咩都唔行啦，一於入去買買買！

有好多龍貓新產品，真係睇到唔捨得走～

呢個龍貓坐墊真係好想買，不過真係無能力囉，希望下次同毛爸嚟時仲有啦，你等我呀....

門口有個雪龍貓，好靚呀！

一大袋走，超滿足！

晚餐去咗間食炸豬扒飯嘅餐廳食，熟悉我嘅人都知道我唔食豬，唔鍾意炸粉槳，我唔鍾意食，唔可以唔俾人哋食架，人哋就咗我咁多，我都要就吓人架，咁我會叫咩食呢...

我叫咗炸蝦，然後剝皮食... 


我今日嘅戰利品：

龍貓手工木碗，第一次見，兩隻款買晒！

呢款杯係限量出，每款出一段時間就無，先前喺香港買過一隻，只係買一隻係因為好鬼貴，而家喺日本買平咗成二百蚊一隻，不過都係買一隻算啦，我個唿已經無晒位啦！

好可愛嘅磁石貼～

呢隻支支咋識郁，可以同次子玩扎搖搖板架！

靚靚毛巾同環保袋，收穫豐富呀！