毛毛豬

2012年5月8日星期二

2013 玻利維亞+南極 - 準備篇(一)

玻利維亞同南極一直係我好想好想去嘅地方，不是毛爸怕暈船浪，所以一路都唔肯陪我去，雖然而家已經有飛機飛入南極，不過我覺得坐船入南極始終係一個好好嘅經歷，有人話俾我知去南極嘅船程等如坐兩日兩夜海盜船，我唔知會唔會暈船浪，但好想經歷一下，另外去完返嚟就可以學吓Ｄ去過南極嘅前輩講＂咩大風浪我未見過呀＂...

用咗幾年時間，我Ｄ音波功終於成功，毛爸今年年頭終於答應咗陪我去！

去南極每年得三個月可以去到(12月至2月)，而且近年都好多人去，所以想揀自己鍾意嘅船同行程，最少要早一年book 定！

其實揀船公司時都好頭痛，好多船公司係會用探險船，但Ｄ探險船通常係有幾十年船齡，但相對乘客會少Ｄ，房好舊，有Ｄ仲要同人share洗手間，呢Ｄ房我唔係幾接受得到，後來俾我揾到一間法國船公司，佢有隻啱啱喺2011年5月先落水嘅船，好新好靚，Ｄ房大部份有露台，我好鍾意，但又覺得呢Ｄ行程係咪唔應該揀呢Ｄ豪華船，揀探險船會唔會睇得嘢多Ｄ呢...諗咗好耐，攪唔掂，走去問毛爸，佢諗都唔諗就揀咗隻豪華船，佢話我哋又唔係去做研究，去睇吓嘢啫，唔洗咁認真，揀隻自己覺得舒服嘅咪得囉！又幾啱喎

於是我就揀咗下面呢程船啦！

Ushuaia (Argentina) - Montevideo (Uruguay) - From 18 February to 5 March 2013
http://en.ponant.com/Cruises/All-our-cruises/Ushuaia-Montevideo

呢隻船本來係可以坐二百幾人，不過因為南極限制每隻船唔可以多過二百人，所以我哋呢隻船一定唔會full!

另外，近年來南極好多人去，已經好難等到last minute price，有人試過喺Ushuaia等咗三個星期都上唔到船，所以想去嘅朋友就最好一早book定，而且係越早book越平，我呢程船係三月中book嘅，同而家個價錢比較，而家係貴過我報時三千美金啦！

2012 日本東京伊豆（1-4-2012 Day 2)

第二天: 橫濱→箱根

東橫INN真係好抵住，小朋友唔洗收加床錢，連早餐都可以一齊食，讚呀！

食飽出發去第一個景點，麵包超人館！

麵包超人館 (Tel :045-227-8855)
http://www.yokohama-anpanman.jp/main.html
横浜市西区みなとみらい4-3-1 (入館料金 1,000円(税込)（1歳以上）
10：00-18：00（最終入館17:00）

姐姐，有人搭你順風車喎！

好可愛嘅溫馨提示呀！

我同毛爸今次身兼幾職，當然包括攝影師啦！

麵包超人館→箱根の森 (Tel 0460-85-6711, Fax 0460-85-7991)***( 71.5KM 1時19分 1,550円 IC-54.4KM)

喺麵包超人館玩咗一個上晝，跟住要落箱根啦，午餐就係途上嘅海老明休息站～

我個午餐好好味呀！

我同小朋友嘅共同嗜好就係雪糕！

上車前買咗杯咖啡，好得呀，仲好味過Starbucks，所以要影低佢，記住先！

下午去咗行箱根市同玩具博物館

四點幾就返酒店啦，因為要浸溫泉，兩個小妹好都好期待究竟浸溫泉係點嘅呢？真係唔俾著衫？

酒店周圍環境好靚！

姑姐我準備好啦！

浸完溫泉去開大餐，今晚Ｄ黑毛和牛好正！

住溫泉酒店當然唔少得shop返Ｄ地道手信啦！

箱根の森 (Tel 0460-85-6711, Fax 0460-85-7991)
〒250-0312 神奈川県足柄下郡箱根町湯本茶屋191
http://www.hakonenomori-okada.jp/index.html
和室16畳タイプ (大人￥11,175×4;小人A ￥9,975;小人B ￥8,925×1 合計￥63,600×1 室)
駐車場 -無料, 夕食時間 18:00-20:00

2012年5月5日星期六

2012 日本東京伊豆（31－3－2012 Day 1)

第一天: 香港 → 東京 → 橫濱

CX504 HK-TOKYO NARITA (0910-1440)

日本我去咗好多次，不過今次有好多第一次遇到嘅事，第一次同小朋友一齊去旅行，第一次有即將離開呢個世界嘅感覺，第一次遇到巨風...去旅行就係咁，無論你去咗幾多次，唔同時間去遇到嘅事物可以係完全唔同，所以我咁熱愛旅遊！

阿哥一家四口加埋我同毛爸，一行六人，今次主要都係想帶兩個小朋友去迪士尼玩～

第一次坐飛機咁驚，當我哋飛到日本上空準備降落時，個機司試咗好多次都降落唔到，架機不停搖擺，不停轉圈，又爬高又降落，攪咗十幾廿分鐘，攪到架機好多人嘔，毛爸話好似坐戰機咁，兩個小妹妹嚇到話以後唔再坐飛機，我喺度諗我同阿哥都喺度，有咩事阿媽同阿爸邊個照顧...毛毛又點算呢...諗到呢度見到機場跑道，即係今次真係落啦，但架機仲搖得好勁，我即刻叫阿哥捉實兩個女同扶實，自己就捉實毛爸，好在最後都成功降落，呢次係我第一次感覺到如果我要離開呢個世界前會係諗緊咩，多謝四哥，你又一次保佑我哋！

落咗機先知，我哋原來算好好彩，安全降落，無人受傷！另一架JAL就因為太大風出咗事！

一架日航客機在東京羽田機場著陸時，機身與跑道觸碰，其後順利降落，無人受傷，跑道一度關閉 15 分鐘。
該架波音 777 客機由上海出發，載有 296 名乘客，下午試圖在羽田機場著陸時，機身尾部與跑道觸碰，之後爬升， 25 分鐘後安全降落。日航正調查事故原因。

可以安全降落，兩個小妹妹開心到跳起！