已經好多年無同毛爸喺情人節去食燭光晚餐，一來我哋怕多人，二來通常呢ｄ日子嘅餐都係set好晒，無咩選擇，未必樣樣都啱食，所以我哋好多時都係中國節日去食西餐，而西方節日就會去食中餐，避一避ｄ人群～～～
但今年情人節我哋破例去咗富豪東方酒店嘅五洲餐廳食晚飯，點解？就係因為呢間餐廳嘅大廚Ken哥囉！我同毛爸一向都好鍾意食佢煮嘅餐，基本上佢煮嘅每一道菜都好啱我哋口味，今次Ken哥邀請我哋去試佢嘅新菜式，當然義不容辭啦！
五洲餐廳個景其實唔錯架，不過我哋去嗰日天氣唔好，而且當日係情人節，餐廳入面又比較暗，影唔到餐廳全景，唯有喺佢嘅網頁度借張相嚟用吓啦！
唔好睇呢個法包平平無奇，外皮脆卜卜，個心軟棉棉，我用咗無比嘅定力先可以控制到自己食一塊，毛爸２件食晒！
Appetizer －香煎帶子伴牛油果，蕃茄芭菲配柑桔汁
無諗過帶子配柑桔汁可以出到ｄ咁清新嘅口味，蕃茄芭菲，濃濃嘅蕃茄味再加上碎蕃茄肉嘅口感.........
Second Course －海蝦伴青蘋果，蘆薈配山渣汁
又係一個好清新嘅配搭蘆薈，山渣汁都係開胃嘅，為之後嘅菜式作好準備～～
Soup - 白龍蝦湯
呢個湯甜到呢......細問之下，原來個煮法同平時嘅龍蝦湯唔同，就係因為改變咗個煮法所以個湯係白色唔係紅色，而落酒嘅時間都唔同咗，所以飲出嚟嘅味道係特別清同甜，原來一個濃湯，祇要改變一下可以變成一個咁好飲嘅清湯～～～
額外加嘅 - 辣椒蒜頭拌意粉 Spaghetti Aglio e Olio con Peperoncino(簡稱AOP)
呢個係我最最最最最最最..........鍾意食嘅意粉，自從愛上咗AOP後，我已經好耐無係街食過其他意粉，雖然AOP用嘅材料好簡單，不過一ｄ都唔易煮，記得之前睇過阿蘇ｄ飲食節目，有一集係講意大利菜，佢話如果去到一間意大利餐廳想知個廚師得唔得，叫個AOP試吓就知，咁你諗到呢個意粉幾難先炒得好食啦！自從Ken哥過檔富豪東方之後，我已經４個月無食過佢炒嘅AOP啦，今次再食返，真係回味無窮呀！
Sorbet - 青檸雪芭伴野莓
嘻嘻.......呢個幾乎食晒先記起未影相，次次都影唔齊成個餐！
Main Course - 牛扒（呢個唔記得咗個名)
呢塊牛扒係用明火燒，好香烤肉味，牛扒面嗰ｄ係奶泡，一上菜時有好多泡泡，慢慢會滲入ｄ牛肉度，咁樣ｄ牛就會又軟又香又滑，真係好好味！
最後甜品一共食咗５款～～～
芒果莧菜卷＋菠蘿皮泡芙＋紅色餅餅（呢個又唔記得咗個名）
呢三款甜品之中我最鍾意芒果莧菜卷，可能係用咗莧菜整啦，佢嘅甜味比一般嘅蛋糕淡，唔會食到有菜味，但有好香嘅芒果味，啱晒我呢ｄ怕甜但又鍾意食甜品嘅人！而個泡芙呢就好得意，個面成個菠蘿包咁，脆脆地，入面軟棉棉，好鬼死夾，好好味呢！個紅色餅餅有比較之下就算無乜特別啦，不過個餅係心型架，無咗佢呢碟甜品又無咁靚同應節啫，佢都有佢嘅存在價值架！
蓮子梳乎厘＋心太軟
梳乎厘又係我鍾意嘅甜品之一，點解鍾意？鐘意佢好似一陣風咁囉，蓮子味都係第一次食，正呀
！至於心太軟就交咗俾毛爸試，因為我唔鍾意食有朱古力味嘅甜品，我試會唔公平架！毛爸話呢個心太軟ｄ朱古力味好濃，唔甜，如果鍾意食朱古力嘅一定會鍾意佢～～
嘩！ｄ朱古力流出嚟啦～～～
最後仲有禮物收添噃，個熊仔最後都係歸毛毛所有啦！
呢晚飽到上頭殼頂，連我最愛嘅咖啡都飲唔落，Ken哥唔好再煮咁多好嘢我食，如果唔係好快到３００磅架啦！
，我ｄ公仔唔賣架，睇吓就得！
