Vancouver(YVR)→Calgary(YYC)→Sunshine village
6點幾就坐車出機場，唔熟路都係早Ｄ出去安心Ｄ～
７點到咗內陸機場，鬼影都唔多隻～
Online checkin噚日做咗，到機場要自己印行李tag，
自己貼上行李度再攞去counter寄，我唔識貼，
直接連tag同行李一齊拎去counter，
Westjet職員亦好樂意教我貼，唔洗５分鐘就寄好行李～
外國動物坐飛機真係一件幾咁平常嘅事，飛機籠周圍都有得賣～
Ｗestjet雖然係廉航，但各方面嘅嘢都比Air Canada好，
多謝我位加拿大朋友好介紹～
準時起飛！
Vancouver(YVR)→Calgary(YYC) WS314 09:00-11:19 (1:19 hrs)
一個多小時嘅機程，轉過頭就過，第一次踏足Calgary機場，比我預計中大好多～
攞埋行李就出去等我個喺香港住嘅加拿大朋友接我，
佢比我哋早幾日到Calgary，返屋企探咗媽咪同適應咗時差先～
呢個trip好幸福，成日都有人接機^0^
Calgary (YYC)→Sunshine village - 161km (1:42 hrs)
我哋住間酒店喺半山，唯一可以上到去嘅交通公具就係Gondola，
而Gondola係收５點，即係我哋最遲要４點前到山腳嘅Creekside Lodge checkin，
所以lunch都係中途隨便買Ｄ嘢食，揀咗香港無嘅A&W~
因為香港Ｄ好難食，所以好耐無食過呢類快餐，今餐又令我喜歡返漢堡包～
有熟人帶真係唔同Ｄ，連GPS都唔洗用就到咗啦...XDDD
喺呢度裡面checkin，行李會有人幫你送上房～
人就自己行過隔離個吊車站自己坐吊車上去～
介紹吓我加拿大朋友蝙蝠生同蝙蝠太^^
見到周圍咁好雪先放心少少～
嚟到半山落車，酒店就係呢個站旁邊，好方面～
房間唔大，不過好多櫃同架放什物，算好唔錯～
仲有個小露台，望到出面嘅雪道同chairlift~
好想跳落去玩！
影影吓相，忽而落起大雪，Keep住落呀！
安頓好行李就落餐廳食飯，呢度有兩間餐廳揀～
隨便揀咗間，好美式嘅裝修～
現場有人彈結他，令到氣氛好休閑舒服，好有放假feel～
呢度仲有露天SPA，可以玩冰火浸！
被安排坐喺窗邊位，對住呢個靚景食晚餐～
4個人叫咗1個沙律，１個小食，２個主菜啱啱好，
之前好怕喺外國餐廳點菜，好多時想叫少Ｄ但好有壓力，
鬼鬼興一人叫一個主菜，但我哋跟本食唔晒，
好似好浪費食物咁~
我哋試過有次喺德國點菜，4個人點咗３個主菜，
然後侍應哥哥唔肯走，咁我哋話我哋係share食，侍應哥哥就話啦，
我知你哋share食，但你哋叫得３個主菜，有個人無嘢攞出嚟share喎...
真係俾佢激到你呢...嚟到加拿大，初初都驚有Ｄ咁嘅問題發生，
不過蝙蝠太教我哋，只要俾夠tips，加拿大唔會發生呢種事～
最初以為呢Ｄ酒店餐廳會幾貴，因為呢度無其他地方食嘢，
而吊車５點後停咗住客亦落唔到山食嘢，獨市生意仲唔劏客咩～
但其實佢Ｄ食物好味得嚟仲好大份，埋單都係十蚊加紙一個人，
即係HK$60蚊呀！係咪好平呢，仲係加咗稅架啦！
Sunshine Mountain Lodge
http://www.sunshinemountainlodge.com/
Box 1510 Banff AB Canada T1L 1J5 1-87-SKI-BANFF
(1-877-542-2633) reservations@skibanff.com
沒有留言:
張貼留言