2016 北海道＋加拿大滑雪+黃刀極光之旅 (Day 14 - 30 Mar 2016 Wed)

Yellowknife - Day 2

瞓醒第一件事係打開窗簾睇吓今日咩天氣，
Ｄ雲已經比噚日散咗好多～

到我哋中午梳洗完出去食午餐時，已經無晒雲，希望可以keep到夜晚～

中午出去食飯，唔太凍-3度，著件風褸就得，唔洗出動到件勁嘢！
呢條就係全個黃刀最旺嘅一條街～

見呢個餐幾吸引就走咗落去地牢度幫嚫佢～


呢度係由一個上咗年紀嘅伯伯開嘅，樓面一個人做晒，
廚房有其他人幫手，見佢忙到Ｃ，我哋坐抵等佢得閒先叫佢點菜，
佢亦好好，知我哋個湯兩份飲，幫我哋分咗兩碗先俾我哋～
好少鬼老地方會用薑嚟整湯，個湯薑味啱啱好，
少少辣，咁凍嘅天氣飲真係好正！


呢個Bison Lasagna都好好味，真係無嚟錯～

條黃刀彌敦道一陣就俾我哋行晒，咁去行超市啦！

呢間超市喺我哋酒店斜對面，大大間，仲好多嘢買～

壽司都有得賣，真係估你唔到～

切好晒嘅生果同沙律盒，我無諗過呢度會有囉～

Ｄ菜新鮮到不得了，而且唔貴，仲要連中式菜都有～

出前一丁都有，問你怕未？

春卷，肉包，粉皮，餃子，呢Ｄ仲唔係照顧我哋國內同胞～

各款亞洲美食應有盡有！

然後美洲食物就以大取勝

買一盒食幾耐呀？？？

買咗支返去試，都係甜到嘔，好在無買多～

買完嘢返到酒店，發現一粒雲都無，今晚真係有希望啦！

晚餐食自家帶嘅，今日下午買咗個生菜，
一於開鮑魚食，鮑汁生菜無得頂！

全靠佢我哋先有咁正嘅晚餐～

食飽又嚟補眠吓，晚上11點就準時到大堂等David嚟接我哋～


衫只可以出門口前一秒鐘著，如果喺房著落嚟會中暑！

今晚竟然無其他人，成個團得我同毛爸兩個人，David無嚟，

叫咗佢同事James嚟車我哋去影，一架十人車，得我哋兩個，真係舒服到呢～

初初都唔係幾見到光，James就車我哋去遠Ｄ度試下，

過咗唔知幾多個湖，James係路上教我哋點樣分架車係行緊陸地定湖面，

湖面開車要注意Ｄ咩，又袋咗Ｄ錢落袋，多謝James!

到差不多12點，我哋去到Prosperous Lake（希望我無記錯個名）

一停抵架車就睇到極光，仲係好勁光嗰隻！

一邊弱咗，另一邊又起，完全無停過～

仲出現好多色～

有一段時間係全個天都係，好似係頭頂跌落嚟咁，
全個湖都照到變咗綠色，我哋剛剛到時，
要用電筒照住地下行，但呢一剎那就好似開咗燈咁，
全個湖光晒！我哋開心到喺個湖面周圍走，
仲要掛住影唔同角度嘅極光，真係超級興奮！

中間凍到頂唔順就返上車暖吓，James準備咗
Ｄ熱飲同香腸俾我哋做宵夜，腸仔好好食呀！

呢Ｄ係我哋部傻瓜機影嘅～

呢一part係James幫我哋影嘅～

今晚超級幸運，可以獨霸晒成個湖，睇到咁燦爛嘅極光，
真係要多謝James，因為之前去到有Ｄ地方James見多人就走，
同我哋去搵Ｄ少人嘅地方，唔洗同人爭，最後嚟到呢個湖中心，
只係得我哋一架車，喺極光散落嘅中心，真係360度任影！

今晚一晚已經值回票價啦！

Explorer Hotel 
http://www.explorerhotel.ca/coming-to-yellowknife
4825 49 Avenue, Yellowknife, NWT, Canada, X1A 2R3