南美之旅第9天 (1-1-2009)

南美之旅第9天 (1-1-2009 星期四)

布宜諾斯艾利斯(阿根廷) →伊瓜蘇(Iguazu)

Date		Itinerary	Flight time
			Hour	Min
01/01/2009	Thu	Buenos Aires (Jorge Newbery AEP) → Iguazu (IGR) 0710 – 0855 (AR2742), Iguazu (Brazil)	1	45

伊瓜蘇(Iguazu) - Brazil

今朝7:10機，晨早5點半就check-out坐taxi去機場，點知等咗好耐都等唔到車，唯有拖住兩件行李行出大街等啦，終於俾我哋等到一架，不過個司機竟然唔識路去內陸機場，但都無辦法要上車，因為嗰陣已經5:50啦，最遲check-in時間係6:10，佢邊揸邊問路，去到附近，好在毛爸又認得路，再點吓佢，我哋終於係6:08到咗機場，車入面3個人一齊拍手，都幾搞笑，落咗車個司機仲同我哋講"Happy New Year"，佢去得到個機場好似仲開心過我哋添！我哋9秒9跑去check-in，好在無人排隊，啱啱好6:10去到check-in 櫃台！

呢個內陸機場仲靚過個國際機場！　　　　　　　　　

今次都係準時起飛，飛機餐都係咁難食，你睇毛爸個樣就知幾難食啦，我叫佢食，佢就攞嚟玩！                                                      

９點鐘已經到咗伊瓜蘇機場啦！　　　　　

又見到人帶住狗狗一齊嚟玩吖，好掛住毛毛呀！

未夠10點已經到酒店啦，呢間酒店都幾好，周圍有好多樹，好大自然feel，間房好大，不過傢俬就唔多，有ｄ空洞洞嘅感覺，不過都唔理啦，瞓陣覺先啦，噚晚瞓咗幾個鐘咋，一陣2點50分仲要去巴西睇伊瓜蘇瀑布架！

瞓醒已經12點幾，今日都未有嘢落過肚，好鬼肚餓，求其去咗酒店餐廳食lunch啦，每人HK$150，不過ｄ嘢又係難食到呢，我都未見過人攞ｄ牛扒加漿粉去炸嘅！最好味就係兩技可樂啦！　　　　　　　　　　　　　　　　　　　　　　

14:50就有人嚟接我哋去巴西睇伊瓜蘇瀑布啦! 首先要出咗阿根廷境，再經過呢條阿巴橋就去到巴西架啦！呢條阿根廷橋好得意，油咗藍白藍嗰邊係阿根廷，而黃綠嗰邊就係巴西！　　　　　　　　　　　　

一入到巴西境，我哋就走咗去坐直昇機睇瀑布啦，US$100/人，坐10分鐘，雖然好貴，不過我哋都照去，因為要坐30個鐘頭飛機先可以嚟到，無理由唔去嘅！

原來呢個桶係要嚟收返ｄ飲完嘅椰清架喎，真係大鄉里，第一次見到！

毛爸都全副武裝準備去影瀑布呀！我等緊上機好緊張呀，咁大個女第一次坐直昇機咋！　　　　　　　　　　　　　　　　　　　　

我哋要飛過一大片森林先會去到伊瓜蘇瀑布架！

呢一個就係成個伊瓜蘇瀑群之中最出名嘅「魔鬼之喉」啦！

無論喺邊個角度睇都係咁靚嘅！　　　　　　　　

10分鐘好快就過咗啦，要回程啦，好唔捨得　．．．D錢呀！

坐完直昇機我哋就坐車去巴西嘅伊瓜蘇國家公園啦，入到去都仲要坐架好靚嘅巴士先可以去到瀑布區架！　　　　　　　　　　　　　

聽日我哋都會去玩嘅快艇！

頭先喺空中睇，而家近距離再睇多一次，呢個喺成個伊瓜蘇瀑群之中最出名嘅「魔鬼之喉」！　　　　　

喺呢個人山人海嘅地方，想影張無人嘅相係唔容意架，一定要有耐性，等等．．

先頭嗰ｄ「魔鬼之喉」就係喺呢個觀景台影架啦！　　　　　

玩到6點幾就要回程啦，返到酒店已經７點，攰到死，又知酒店同附近都無咩好食，沖完涼就落咗coffee shop，我同毛爸兩份食咗一份三文治，飲咗兩杯橙汁，佢ｄ嘢唔好食，無謂晒quota啦，返房嘆埋杯自備咖啡就瞓覺啦，聽朝一早仲有精彩節目呀！

Hotel : Orquideas Hotel 
Address : Ruta 12 - Km 5 (3370) Pucrto Iguazu - Misioncs - Argentina.
Telephone : (03757) 420472 / 420195 / 421595
Fax : Telefax: (0054) (3757) 420472/ 0195/ 421595
Price/night :  
URL : http://www.orquideashotel.com/
e-mail : orquideashotel@orquideashotel.com