南美之旅第17天 (9-1-2009)

南美之旅第17天 (9-1-2009 星期五)

Buenos Aires-Valparaiso Cruise on Celerity Infinity (Day 6) - Port Stanley, Falkland Island

今日我哋終於都可以踏足福克蘭群島啦，一個未曾想過可以踏足嘅地方，由於我哋下午報咗團去睇企鵝，所以食咗早餐就拿拿聲出發上岸行吓啦，因為Port Stanley個碼頭太細，停唔到我哋隻船，所以我哋要坐救生艇接駁。

我哋係Theater 排隊等上救生艇。

早上10點半就上到岸啦！

由於時間關係，其實我今次去嘅都係ｄ比較普遍嘅南美景點，我諗比較少人去嘅可能就係Falkland Island啦，我哋喺Port Stanley上岸，呢個鎮仔好細，全個鎮都唔夠３千人，我哋兩搜郵輪同時停呢一個Port，即時搞到人山人海！Port Stanley因為係英國嘅領土，所以係講英文，我哋嚟南美啞咗咁多日，今日買嘢係最暢所欲言嘅，仲好有親切感添！
Port Stanley風景好靚，沿住海邊慢慢行吓睇吓影吓大半日可以行晒！而且大部分嘅紀念碑都係喺海邊！　　　　

呢度ｄ人同遊客都應該幾愛護ｄ小動物，所以呢度ｄ雀仔一ｄ都唔驚人，你有你喺度坐，佢有佢喺度睇你做咩，好和諧，好溫馨！

呢枝係一隻1843年造嘅蒸汽帆船嘅桅桿。

呢間咁細嘅屋仔就係警察總部啦，証明咗呢度治安一定好好啦！

Government House

紀念1982年福克蘭戰役陣亡英兵嘅廣場！

呢度成個灘都係青口都無人要呀！

而嚟到呢個小鎮嘅遊客都有一個指定動作，就係買post card寄返屋企，呢度ｄ郵票同post card 都好靚，主題都係圍繞住企鵝同海獅，咁難先嚟得到嘅地方，我哋梗係唔執輸寄返張啦！　　　　

呢度好靚，我哋淨係沿住海邊行，停吓，睇吓，影吓相，已經用晒我哋成個朝早啦，下午２點我哋要去睇企鵝，所以雖然未行完都要回頭啦！

2點鐘準時出發去Bluff Cove 去睇 Penguin Rockery，首先要坐20分鐘車去到一個比較接近企鵝嘅地方，跟住就會轉一架4驅車再前進，起初都覺得好奇怪，ｄ路好好地轉咩車啫，跟住就知死啦，完全唔係路嚟架，架車試過45度上斜同落斜，"登"到心肝脾肺腎都掉轉晒位，呢程20分鐘嘅4驅歷程真係物有所值啦，完全知道晒4驅車嘅好處！               

Bluff Cove 有大概２，３千隻Gentoo Penguin，同５隻King Penguin，嗰５隻King Penguin因為已經生咗蛋，所以只係企係中間，好難影到，因為我哋係唔可以行入去ｄ企鵝群中間架！雖然第一次睇到企鵝好興奮，但當我去到Punta Arenas - Magdalena Island時，就覺得呢度睇企鵝一般啦，唔夠多，唔夠自然，似農場多ｄ囉！                                    

我為咗影ｄ企鵝嘅真面目，追咗佢哋9條街呀！

唔俾影咪算囉，使唔使咁呀？　　　　　　　　　

　

呢度得5隻皇帝企鵝，由於佢哋生咗蛋，所以淨係企喺ｄ企鵝群中間，好難影！

唔知點解，企鵝無論係咩姿勢都係咁可愛嘅呢！

　

喺睇企鵝嘅海邊有間英式Cafe，睇到攰可以入去飲杯茶食件餅！

喺度停留咗大概1個鐘頭到就要返碼頭啦，當然又要捱20分鐘大爛路啦，沿途我哋仲影到我哋隻船添！　　　　　　

坐大概20分鐘接駁艇就返到我哋隻船啦，不過回程好大浪，坐近出入口ｄ人，耐唔時就大叫，原來大浪得濟會有水撇入嚟，好多人都濕咗，好在我哋坐得好入啫，5點半我哋就返到上船啦！　　　

今日無時間食午餐，好鬼肚餓，沖咗涼就拿拿臨去食晚餐啦，今晚Daddy食嘅頭盤，餐湯同沙律竟然全部同我一樣喎，不過因為大家都好肚餓，所以我哋2個人食咗3個主菜同3個甜品！嘻嘻．．．　　　　　　　　   　

今次睇企鵝都幾搞笑，我影到ｄ企鵝”捉依仁”同痾大大！