2015 農曆新年極地滑雪の旅 Day 5 (18 Feb 2015 Wed)

利維滑雪渡假村 (LEVI SKI RESORT) - SNOWBOARD DAY 3

嚟到呢度，我不知不覺咁鍾意咗佢哋Ｄ煙三文魚，
有鮮味而唔會好咸，每朝都要食返幾件...XDD

一份有營養早餐要有嘅成份呢度有晒^^

今日超級無敵嘅好天，本來今日唔打算去滑嘅，都因為天氣咁好之下而出動啦！

11點幾出發，準備上山頂影Ｄ相落嚟俾毛爸睇，
個山得個唔夠1000ｍ，一點前應該可以返嚟陪毛爸食lunch~

出發！

順利挑戰完第一條T-bar，呢個係出口，
第一日毛爸就係喺呢度call車送佢返酒店！

上到嚟呢個位先發現唔記得帶地圖，
要上山頂都幾煩，好在有電話，唔係點記得！

第一日到此為止，今日我繼續去探索吓先！

經過一段平路（都叫做滑到唔洗行，係最後行少少）,
終於見到條斜路，又拿拿臨著返塊板，準備衝呀！

轉出嚟就係呢度，連身都未熱到已經到下面嘅平路，又除咗板行...

又行咗一段路後就見到呢條平路，
行吓滑吓，著板除板，我都唔記得幾多次！

千辛萬苦終於到咗上山頂嘅吊車站，但點解咁長龍架，
喺日本都真係未試過排咁耐隊呀！

就係俾呢個咁靚嘅藍天呃咗我上嚟！

好啦，終於上到吊車啦，喺將近到山頂時，吊車停咗，
出面勁大風吹到架車搖搖吓，有芬蘭文廣播，不過我唔識聽，
等等吓架吊車仲行返轉頭，唔係麻，山頂真係咁難去！

好在，最後佢都有繼續向山頂行，終於我上到山頂啦！

人山人海嘅山頂，Ｄ人多過山腳！


好啦，咁正式向山腳出發啦，第一次上呢個山，
我就揀咗條Green嘅雪道落山，之後我不知幾咁後悔揀條Green呀！

好開心sir咗一條小斜路，但之後係一條大平路，又行....

之後又sir一段小斜路...

當然之後又係行啦....

不斷行...

我見連玩ski嘅人都滑得好辛苦，所以呢段路我都係用對腳行嘅！

終於見到可以真正sir落山嘅地方，毛爸我嚟同你食lunch啦!!!!

點知一轉出去就見到我哋間酒店，仲要cut唔切返入酒店，
焗住sir到落山腳再坐酒店吊山返，真係激到我一頭煙！

最終2:30先可以開餐！

呢度Zero係樽裝～

Lunch唔係burger就係pizza, 好在個pizza幾好味啫！

因為個brace要喺返香港前還俾Lolo，我有Ｄ擔心毛爸坐飛機時有機會整嚫隻腳，下午眠一眠之後，為求安心都係捉佢去睇吓醫生，攞返個brace會安心Ｄ～

睇完醫生順便喺Town食埋飯先返上酒店～

經話Ｄ舖頭都去格吓價，睇中紫色呢對boot，
減咗價退埋稅只係HKS1,000真係抵到呢，可惜無我szie...(T.T)

又有行吓Ｄ手信舖～

"All you need is LOVE and a Dog"真係like爆呀！

唔覺意俾我發現我著緊對boot嘅綠色版，仲做緊半價，
我買時差不多要３千港幣，而家折晒退埋稅只係１千港幣，
洗唔洗平成咁呀？！

話說呢我有個朋友同我一樣係玩snowboard嘅，而且仲係勁鍾意綠色，
今年又正準備買鞋，更巧合嘅呢係佢叫Ivy，而最好彩嘅係佢隻腳同我一樣大，
我可以幫佢試鞋，當時發生咗咁多巧合，我第一時間通知當時人啦，
再俾一晒時間佢考慮！明天話你知佢買唔買啦^o^

今晚食Lolo介紹嘅皇帝蟹，之前見有團友無book位食唔到，
所以噚日已經叫酒店幫我哋訂好位～


呢度建議人４個人食一隻蟹，蟹係主菜，
呢度Ｄ蟹話係唔知深海幾多米捉嘅野生蟹，唔係養架喎～
不過因為我哋夾唔到團友時間一齊嚟食，咁就叫佢俾隻細少少我哋，
不過都1.7kg，問準毛爸，咁我哋今晚就豪俾佢啦^o^

超級鮮甜，比日本Ｄ仲好食，而且仲係蒸到９分蒸啱啱好，

今餐係貴Ｄ，不過物有所值～

拆完蟹去洗手，發現洗手間又大又乾淨，仲好優雅～

食飽飽就返酒店，呢度雖然地方好多，不過都興地下停車場架～

返到酒店睇吓，呢個醫生俾嘅brace好似有Ｄ誇喎，仲可以較角度架，
今次睇醫生，照咗兩張X-ray加埋呢個brace盛惠690歐，
喺歐洲睇醫生真係天價！

Hotel Levi Panorama

http://www.golevi.fi/en/accommodation/hotel-levi-panorama