2015 札幌，二世古之旅 Day 1 (17 Jan 2015 Sat)

香港 → 北海道新千歲機場→ 札幌市

CX582 Hong Kong - SAPPORO CHITOSE (12:00-17:35)

滑雪季節，又再出發，今次衝出長野去北海道～

以前我帶毛毛去日本都係喺呢度放抵佢～

預咗飛機餐難食，食飽先上機^0^ 

 遲咗半個鐘起飛，呢半個鐘就大影響囉...

又俾我估中有咩食...好在我食飽咗啫...XDDD

 因為大風雪，喺北海道天空盤旋咗個幾鐘，
正好係黃昏時間，睇到好靚嘅晚霞，仲有滿天嘅繁星，
除咗喺玻利維亞，我未見過咁多同咁大粒嘅星星，
真係以為自己去咗太空館...XDDD

估唔到嘅係一雲相隔之下竟然大風雪到要關閉機埸。
因為我哋唔夠油等重機埸重開，機長決定轉飛東京成田，
一個半小時機程好快過，期間機長有不時update我哋降落後嘅安排，
不過就一直都未知到底加油後會即晚飛返札幌定要定一晚東京...
到飛機降落成田機場，喺機艙等咗大概十分鐘，
機長宣佈當晚唔飛，改第二天中午12:30再飛，及之後嘅安排，
等待期間，全機都好平靜，無人嘈，無人鬧，無人打空姐...XDDD
一落機已經有人分流個人客同團體客，之後派酒店coupon及安排詳情，
全程唔洗兩分鐘，非常流暢，跟住去排隊過移民局，然後去攞行李～


行李帶旁邊已經有工作人民指示我哋點樣去巴士站～


一路行一路有人指示，只要你有少少懷疑點行，即刻就有人上前指示，


去到酒店有指示非常清楚，有專櫃幫我哋，排隊攞鎖匙唔洗5分鐘～

由落機到上到酒店房唔洗一小時，真係唔敢相信，
雖然今次蝕咗一晚酒店同一日時間，不過體驗到CX咁專業嘅安排，
完全值得，無投訴，仲要讚揚吓CX，而且今次係天空影響唔關CX事！

 晚餐酒店包埋，都OK啦～

食飽有出去酒店花園行吓，好靚！

希望聽日一切順利啦～

Hotel Nikko Narita