毛毛豬: 2014 英國巴庫＋冰島＋日本東京 DAY 7 (23 SEP 2014 Tue)

2014 英國巴庫＋冰島＋日本東京 DAY 7 (23 SEP 2014 Tue)

Hof 1 Hotel →Svartifoss→Jökulsárlón→Hali

早餐酒店包埋，噚日都見幾多人住，不過食早餐就無乜人，唔通我哋太早？

好鍾意佢Ｄ椅，全部墊咗毛毛架，好舒服！

例牌早餐，好少選擇～

呢間係我哋酒店後嘅屋好靚，應該係呢度Ｄ豪宅～

Hof 1 Hotel →Skaftafell (Vatnajökull) National Park - Svartifoss waterfall (21km 0:21)

今日要走少少回頭路去返噚日未玩嘅Svartifoss waterfall，9點到達Skaftafell (Vatnajökull) National Park仲未開門，本來想去攞張地圖先開始行架，咁唔等啦，照行先啦，應該有指示嘅～

夏天呢度好多人露營，不過冰島嘅9月已經得返3幾度，露營會凍Ｃ架！不過都見到有人露營，勁！

咁凍都有菇出喎！

由Skaftafell (Vatnajökull) National Park門口行去Svartifoss waterfall大概要1.5小時，

要睇靚嘢係要付出Ｄ腳骨力嘅！

其實沿途風景都好靚～

路上亦有指示牌，但唔多，要小心留意～

中途有經過Ｄ不知名嘅瀑布～

唔經唔覺已經行到半山，影吓行吓又唔係好辛苦喎～

見到呢個影真係心曠神怡！

加油，好快到架啦！

1.5小時嘅路程有9成係上斜，揹住重裝備嘅人就辛苦Ｄ啦...XDD

望見家鄉啦！

一步步行近，感覺好正！

仲要係今日好好天，令呢個瀑布更靚！

現場睇呢Ｄ石有一粒一粒水珠流落嚟，喺太陽光照射下，好似一粒粒鑽石咁，好靚，好靚架！

可惜我哋Ｄ相機完全影唔到個效果，呢個景只可以留喺我記憶度啦！

影完諗住沿路返落去，點知...

又見到咁嘅景，於是又喺個山頂玩咗一大輪～

之後終於肯落山啦～

開頭我哋無留意，原來一開始我哋已經行錯路，慢慢我開始覺得Ｄ路唔啱，D路越行越細，

之前應該無行過，即刻叫住唔好行，返轉頭，再行落去唔知會去咗邊，

好後悔無等旅遊中心開門攞地圖～

當我哋行返轉頭時遇到一個捷克男仔，佢一個人嚟玩，
佢話我哋行條路係可以落返旅遊中心嘅，佢都係落山，
叫我哋一齊行喎，無選擇之下唯有跟佢啦！
條路真係可以落到山，不過遠好多同難行好多，有Ｄ唔係路嚟，
有Ｄ草去到大脾咁高，要踩住Ｄ草行，又有泥漿路，真係一步一驚心！
落到山真係要還神！

毛爸行到一腳一褲都係泥～

攪到點幾鐘先開車去食飯～

我哋開飯前，要餵飽架車先！

Skaftafell (Vatnajökull) National Park→Hali Country Hotel (70.3km 0:50)

行完山又攰又餓，好想食Ｄ好嘢，於是決定先返今晚住嘅酒店食lunch，

之前有search過，呢間酒店Ｄ嘢係好好食架～

個樣都幾靚架！

兩點幾都仲有咁多人喎！

係冰島食嘢，大致都係呢個價錢，對返HK$只要將個冰島銀碼X0.67就得～

見到嗎，麵包同湯係另外俾錢架～

羊肉湯，我唔飲嘅，朋友話好好飲，之後嘅行程一飲湯就講呢碗湯好飲，

佢話係佢喺冰島飲到最好味嘅羊肉湯喎！

其實我個磨菇湯都好好味！

得羊同魚，我當然係食魚，太幸福，餐餐有魚食，同埋真係煮得好好食～

本來準備check-in，不過間房未執好，咁我哋又係附近行吓先～

隨便一個景都咁靚，冰島真係好值得一去再去架！

行行吓見到冰島馬，一Ｄ都唔驚人，好可愛！

兩隻都任人摸，好乖！

仲有牛架，不過無馬仔咁親人囉～

我哋就係住喺最近海嗰間白色屋仔～

房間好大好靚，仲好乾淨～

沖涼房都好正～

放抵行李，我哋又再出發！
Hali Country Hotel→Jökulsárlón (13.8km 0:10)

好多朋友嚟冰河湖會選擇坐船去睇Ｄ冰～

但其實Ｄ冰係好近嘅，唔洗坐船啦～

仲有海豹喺度玩～

睇完冰河湖，唔好漏咗去行黑沙灘呀，黑沙灘就係呢條橋嘅另一面～

黑沙灘靚到不得了，不過又係大風到不得了！

因為佢Ｄ沙係黑色，感覺好淒美！

雖然呢度好大風好凍，但大家都唔願走，直到黃昏～

Ｄ冰好似鑽石咁，不過都係帶唔走架～

晚餐都係酒店食，有水準，呢間酒店絕對係我喺冰島嘅首選！

經過一日緊密嘅上山下海行程，真係攰到Ｃ咗，當我沖完涼，
準備攤Ｃ嘅時間毛爸話要出去影星，
我無佢咁好氣，叫佢自己出去影，我無能為力啦！
點知影完返嚟俾我睇，我問佢點解Ｄ相綠綠地色咁嘅？

於是毛爸咪又出去睇吓點解會影到咁架，一睇原來係有極光呀，
當時只係夜晚８點幾，個天啱啱黑，仲要喺酒店門口咁光嘅地方都睇到，
真係唔係幾信！下面Ｄ相都係喺酒店門口影，
太神奇啦，我成日都以為要去荒山野嶺同半夜三更先睇到添！

跟住我諗起睇過好多喺冰河湖影嘅極光相，於是問嗰兩個男團員，去唔去冰河湖影，
兩個都話唔去，呢度已經好靚喎，其實都好難怪佢哋，一團４個人，有三個係完全無睇過冰島資料，
只係知自己要去冰島啫，再問完又問，我問到第三次話我問最後一次，你哋唔去會後悔架，
佢哋先醒覺，拿拿臨開車去，真係激Ｃ我！

我哋去到時已經好多人喺度影緊，好在有嚟咋，呢度影極光有晒背景，靚呀！