2013 玻利維亞+南極 - 後記

呢個玻利維亞+南極之旅對我同毛爸嚟講真係好難忘，當中有好多開心同唔開心嘅事，好在都可以一一克服到，好經典嘅一個結婚廿周年紀念，就好似我哋呢廿年嘅生活咁！


首先係我哋成功入咗玻利維亞嘅第二天早上，嗰日我哋會開始進入玻利維亞嘅山區，會同呢個科技世界暫停聯絡三日...食早餐時收到毛嫲嫲身體不適嘅消息，情況還好，只係無精神照顧小毛毛，於是即刻搵朋友接走毛毛代為照顧，希望毛嫲嫲可以有充分嘅時間休息！嗰日我同毛爸都係懷住好沉重嘅心情出發...一路上我心情都好差，William就不斷講笑氹我開心，漸漸心情就開始平息，William知道我哋屋企有事就專登去買咗張喺山區用到嘅電話卡，等我哋有需要時可以聯絡家人，William真係好好！

當晚到咗住嘅旅社，我身體有高山反應，心就好掛住香港嘅毛嫲嫲同毛毛，食飯時打咗電話返香港，歡家已經接咗毛毛去住(呢次係毛毛第一次外宿，估唔到一住就三個星期），而毛嫲嫲亦有姑仔同朋友Co ma照顧，咁我個心就比較定...順利完成咗玻利維亞嘅行程～

跟住就到我哋返到阿根廷準備開始南極之旅，毛毛同毛嫲嫲嘅情況都算穩定，我哋決定繼續行程！不過就會有16日聯絡唔到，順利完成16天旅程，一上岸第一時間搵wifi上網，出事！於是我哋不斷改機票，希望可以早d返香港...我哋會坐三程機，頭兩程都好順利改到，點知最一程改唔到，都係照原定時間返到香港，無奈！

三月八日返到香港，即刻去歡家接毛毛，毛毛唔認得我，佢一定以為我唔要佢，呢三個星期，毛毛一定好唔開心！歡家照顧得毛毛好好，佢哋為咗毛毛唔好諗咁多嘢就日日帶佢落街行，等佢行得攰攰地返去就瞓，真係辛苦晒歡爸，毛毛返屋企乖咗好多！

毛爸就第一時間返屋企睇毛嫲嫲，情況還好，只係唔知咩事，周身都唔舒服，唔想出街，跟住嘅十幾日我哋就帶咗毛嫲嫲去睇唔同嘅專科醫生，驗呢樣，驗嗰樣...最後喺三月十九日入咗醫院一直住到而家都未出得院，不過而家已經開始轉好，希望下個月可以出院啦！

毛爸呢半年來每日都要奔波喺醫院間，都好辛苦吓，但無辦法，毛嫲嫲呢個病係需要屋企人好大嘅支持先會快d好，抑鬱症真係需要好多時間，好多愛心，仲要好多耐性！有呢個病嘅朋友屋企人加油呀，你哋嘅付出會有回報，佢哋會好返架！

喺呢短短半年間, 我發現我身邊真係好多好朋友, 每次我有咩要買要搵要知要問, 全部佢哋都會幫我攪掂晒，風大雨大去幫我買嘢，仲要送埋貨攪到自己一身濕晒，自己幫唔到嘅就周圍搵朋友問，香港，日本，台灣，大陸，我要買嘅嘢都幫我買晒返嚟，有Ｄ仲驚我太辛苦煲埋湯俾我飲，我話要飛曼谷，全機爆滿都搵到兩個位俾我，就係咁我同毛爸先可以安心去照顧毛嫲嫲，多謝晒你哋！